طبعا بنحضر الحمام بغسله جيدا ونقعه فى ماء وخل لدقائق حتى لا نشعر بطعم او رائحة غير مرغوب فيها.
1- هنقطع الكبد و القوانص والقلوب بتاع الحمام قطع صغيرة واما ان نصفر بصلة صغيرة على النار ونشوح فيها الكبد والقوانص والقلوب او من غير بصلة يعنى فى السمن على طول وننتبله بملح وفلفل اسود وبهارات وجنزبيل ونضعه جانبا.
2- نحضر الارز وعادة بيكون لكل حمامة 4 ملاعق كبيرة ارز نغسله جيدا ونحمره فى نفس الحلة اللى شوحنا فيها الكبد نحمر الارز ونتركه حتى يبرد.
3- نحضر بصلة وندعكها بالأيد بملح وفلفل وبهارات ورشة قرفة ونضعها على الأرز وانا مش بضيف الكبد على الارز انا بضعها على جنب واحطها فى الحمامة مع الحشو حتى اذا تبقى بعض الارز مايضعش فيهم الكبد والقوانص.
4- تكونى محضرة الحلة اللى هنسلق فيها الحمام تملأ الماء بحيث فقط يغطى الحمام ونضع فيها ورق لورا وحبهان وبصلة وملح وفلفل وبهارات.
بالنسبة للحمام لازم تفصلى بأصبعك لحم الحمام عن الجلد من عند البطن والرقبة حتى نستطيع وضع الحشو.
نكون محضرين اما خلة حتى نغلق بها الحمام او ابرة وفتلة.
5- نحشى الحمام من جوة بالارز وماتنسيش توزعى الكبد والقوانص فى الحشو وتحت الجلد وعند الرقبة ولا تضعى الارز بكثرة لأنه عندما يستوى الارز ينتفخ فمن الممكن ان يفرقع الحمام.
6- ونقفل الحمامة من عند الرقبة والبطن ونضعها فى الحلة عندما يغلى الماء ونغطى بغطاء الحلة ثم نهدئ النار حتى يستوى الحمام والارز ولا يفرقع بالضبط ساعة الاربع ونطفئ النار ونرفع الحمام من الشوربة.
7- نحضر حلة او طاسة نضع فيها زيت ومعلقة سمن ونسخنها ثم نضع الحمام ليتحمر لازم الزيت يسخن لو وضعتى الحمام والزيت بارد هيلتصق بالحلة ويتقطع الجلد ويقع منه الحشو.
نقطع الخيوط بالمقص او ننزع الخلة ويقدم ساخن
ولاحظى الارز مفلفل وجميل بالداخل
وبالهنا والشفا
ياسيدي ياسيدي
ردحذفاحنا دخلنا في الشغل الجامد
جميل قوي تسلم ايدك
بقى لي فتره مأكلتوش لانه مش موجود هنا
مستنيه منك طبق لما آجي إن شاء الله
:)
ان شاء الله يا نانا
ردحذفمن عنيا بس غريبة مفيش حتى سمان مجمد طبعا ما هو برضه بيكون جميل وبنفس الطريقة
فيه سمان بس صغير قوي مجربتوش الصراحه
ردحذفلكن في بط حلو قوي
تسلم عينك يا رورو
جربيه طعمه حلو انا جربته وكان جميل بجد
ردحذفالله الله
ردحذفجميل وشكله جميل , والله أحسن من حمام أكلته من محل مشهور جدا ولكن ده شكله - وأكيد طعمه - أحسن
اعملي حسابي مع نانا
شكرا يا قمر وماتقلقيش نصيبك موجود
ردحذفتسلم ايديكى ياقمر
ردحذفعلى فكره انا كنت اخدت منك وصفه الكيكه الاسفنجيه برساله خاصه
على فتكات
تسلم ايديكى مره تانيه
بالتوفيق
اهلا بيكى يا قمر
حذف