محشى بكل انواعه بأرز مفلفل ..............
500 جم ورق عنب
500 جم كوسة
500 جم باذنجان ابيض
500 فلفل رومى
حوالى 4 كوب ارز
2 بصلة متوسطة + بصلة صغيرة
زيت ذرة او عباد شمس
بهارات – ملح – فلفل اسود – جنزبيل – مطحون لورا وحبهان
طماطم
ا – يتم تنظيف وتقطيع ورق العنب بالحجم المناسب وسلقه وشطفه تحت الحنفية وكذلك تأوير الباذنجان والكوسة والفلفل الرومى (افضل ان يكون ذلك فى اليوم الذى يسبق يوم الطبخ) .
2- نضع على النار زيت ذرة او عباد شمس ونحمر البصلتين ثم نصب عصير الطماطم او الطماطم المسبكة اذا كنتى ممن يحتفظوا بالطماطم مسبكة فى الفريزر مثلى ونتركها حتى تتسبك ثم نضع قليل من الملح والفلفل الاسود ونضع جنزبيل وبهارات ومطحون اللورا والحبهان حسب الزوق او الطعم اللى تحبيه.
نصيحة :
1- استخدام الزيت فى المحشى افضل من السمن لان الزيت يجعل الارز للمحشى مفلفل.
2-عند تسبيك الطماطم للحشوة احرصى الا تتسبك على الاخر بل يجب ان تكون سائلة قليلا.
3- نحضر الخضرة بعد غسلها وتصفيتها وتقطيعها ولا تكثرى منها حتى لا تطغى على الطعم وندعكها بالملح والفلفل (كل كوب أرز يحتاج الى معلقة صغيرة ملح).
.................................................................................................................
4- نضع الخضرة على الارز وبصلة صغيرة مبشورة نية والتسبيكة ومن الافضل ان نترك بعض التسبيكة احتياطى وذلك حتى اذا احتاجنا بعض الارز نجد له تسبيكة واذا فاضت يمكن حفظها فى الفريزر لتستخدم فى المرة القادمة.
5- نقلب الخلطة جيدا ثم نضع بعض الزيت حتى نرى الخلطة تلمع.
6- نبدأ بلف ورق العنب مع الحرص ان يكون شكله متساوى ويرص فى الحلة بعد وضع عيدان ورق العنب فى قعر الحلة (تم سلقها) ونضع عليها اما طبق او اى شئ تقيل شوية لان عندما تغلى الشوربة بيتحرك الورق العنب وممكن يفك .
7- نحشى الباذنجان والكوسة والفلفل مع الحرص بعدم ملء الحشوة عالاخر تقريبا نترك عقلة اصبع حتى نعطى مساحة للارز ينتفخ عندما يستوى .
8- تقريبا نص كيلو العنب يأخذ 2 كوب أرز وبذلك نضع 2 كوب شوربة عليه عصير ليمونة ومعلقتين كبار سمن على حلة ورق العنب مع الاخذ فى الاعتبار ان تكون ساخنة
9- وكذلك 2 كوب ارز تقريبا للحلة الثانية اى 2 كوب شوربة ساخنة عليه معلقتين كبار سمن مع مراعاة ان تدخل فى كل باذنجانة او كوساية او فلفلاية.
10- نشغل النار حتى تقل الشوربة فى الحلة ثم نهدئ النار ونضع الشياطة حتى يستوى.
11- اذا استوى ورق العنب وكان فى قعر الحلة بعض الشوربة الزائدة فحاولى التخلص منها بوضع غطاء على الحلة وصبها حتى تستطيعى قلب حلة ورق العنب فى طبق التقديم.
وبالهنا والشفا
جميل اوي أوي . بموت في الريحه اللي بتطلع وهو بيستوي
ردحذفأنا بعمله بنفس الطريقه تقريبا
أنا بحط الليمون على الخلطه ومعاه قرفه وممكن ملح لمون كمان
لكن الكوسه والباذنجان مش حلوين هنا . بأعمل ورق عنب وفلفل
ولو فاض عندي رز خلطه بطبخه بالشوربه بيبقى حلو اوي
تسلم ايدك
شكرا يا نانا
ردحذفاكيد فى كندا مابيعملوش محشى عشان كدة مش مهتمين بزراعة الكوسة والباذنجان هههههههههههههههههه
انا مجربتش موضوع ملح الليمون دة ابقى اجربها
وشكرا على متابعتك المدونة