المقادير:
2 كوب دقيق
رشة ملح
م/ ص سكر
1م/ص خميرة فورية
كوب لبن او ماء دافئ فقط
الطريقة اما فى العجانة او الفودبروسيسور بالأداة الخاصة بالعجن او بأيدك
1- نضع الدقيق والملح والسكر ونشغل العجانة على البطئ مع صب اللبن بس مجرد ما يتبل الدقيق تضعى الخميرة الفورية وتكملى وضع اللبن وتزودى السرعة عالاخرحتى تحصلى على عجينة ملساء ناعمة لا تلتصق بالعجانة.
2- نرش دقيق بسيط اوى فى طبق ونضع فيه العجينة ونغطيها بكيس بلاستيك وفوقه فوطة اواى شئ تقيل للتدفئة وتوضع فى مكان دافئ حوالى ساعة حتى يتضاعف حجمها.
3- نخرجها من الطبق ونقسمها 4 اجزاء متساويين بسكين ونعمل كل واحدة كورة ونغطيهم بفوطة
وناخد اول كورة نرش دقيق بسيط على الرخامة والنشابة ونفرد على شكل دائرة على فكرة ممكن تفردى العجينة على قطعة قماش مثل ملاية سرير نظيفة طبعا بدون وضع دقيق وتأكدى انها لن تلتصق.
4- وتكونى حاطة قماشة مفرودة كل ما تفردى رغيف تشيلى بحرص بحيث ان اصابعك ماتعلمش و ماتضغطش عليه لان المكان اللى صباعك هيضغط عليه مش هينتفخ وتحطى على القماشة وتغطى بقماشة عشان العجينة ماتنشفش لحد ما تفردى الاربع اجزاء.
5- تتركيهم كدة ربع ساعة اللى فيهم هتجيبى طاسة تيفال لازم تيفال وتحطيها على الشعلة الصغيرة مش الكبيرة
وتتركيها ثوانى حتى تسخن اووى.
6- تاخدى اول رغيف فردتيه برضه من دون ان تغرسى اصابعك فيه وتحطى فى الطاسة السخنة ومعاكى مغرفة مستطيلة اول ما يفقفق اى يعمل فقاقيع بسيطة (ممكن بعد حوالى 20-25 ثانية) تقلبيه براحة على الناحية التانية (وبرضه تاخدى بالك المغرفة ماتجرحوش والا مش هينتفخ) هتلاقيه عمال يتنفخ يتنفخ يتنفخ لحد ما يبقى رغيف ممكن تقلبيه تانى لو شايفة انه محتاج يستوى تانى من الناحية الاولى عايزة اقولك ان الموضوع مش بياخد اكتر من دقيقتين وسهل جدا جدا.
ملحوظة :
1- اذا تركتى الرغيف يفقفق ولم قلبيه هينتفخ ولكن هتضطرى تقلبيه عشان يستوى من الناحية التانية فهتلاقيه فرقع فهيكون شكله مش حلو لكن طعمه برضه تحفة وعلى فكرة حتى لو مانتفخش والله برضه طعمه تحفة
دة شكله لو فرقع
2- استخدام اللبن فى هذه الوصفة يجعل العيش طعمه احلى بكتير من استخدام الماء (مع اللبن بيكون اسمك وفيه زى لبابه بسيطة)
- وممكن تضعى الماء ومعلقة كبيرة لبن بودر
ودة الشكل النهائى
وشوفى شكله من جوة
طبعا العيش دة تحفة للفطار او العشاء وخصوصا مع البطاطس المحمرة المقرمشة والفلافل
وبالهنا والشفا
الله الله جميل قوي
ردحذفأنا بعمله في الفرن بيبقى حلو برده
تسلم ايدك
:)
شكرا يا قمر
ردحذفهوة طبعا بيتعمل فى الفرن برضه لكن اللى فى الفرن بيكون انشف شويه لكن اللى عالطاسة بيكون طرررررى جدا يعنى حسب ما بتحبى
عاشت ايدج، اليوم جربتها وطلعت مضبوطة. اني عادة اسويها خفيفة بس اليوم سويتها ثخينة مثل الصورة وطلعت آووسم ونفخت بحيث اكدر افتحها واحشيها، شكراً ^_^
ردحذفسؤال: هل تقصدين باللبن، حليب (milk)؟
أسيل
شكرا يا اسيل والله مبسوطة جدا انك جربتيه وعجبك
ردحذفايوة يا قمر اقصد باللبن الحليب milk احنا فى مصر بنقول على الحليب لبن
واى سؤال انا تحت امرك
shokran leeky ana garbto wetel3 7loo awy
ردحذف