السمن البلدى من قشطة اللبن البلدى طعم وريحة تحفة .......
طبعا افضل شئ تعملى السمن البلدى فى بيتك عشان يكون مضمون هتشمى ريحة مش ممكن تحفة وطعم ماقولكيش لدرجة انك ممكن تاكليها كدة
هقولكم بقى حكايتى مع السمن البيتى البلدى انا كنت بعمل رجيم انا وجوزى فكنت بغلى اللبن واحطه فى التلاجة وتانى يوم اشيل القشطة اللى بتتكون على وش اللبن عشان اللبن يبقى خالى الدسم وكنت بشيلها فى الفريزر لليوم الفرى نفطر بيها بالعسل الابيض بس طبعا ماكنتش بتخلص لانى بصراحة بجيب لبن بانتظام.
المهم صدفة عرفت من النت ان ممكن اعمل من القشطة دى سمن بلدى فقولت لازم اجرب
ودى طريقة السمن البلدى المنزلى بالصـــــــــــــــــــــور
طبعا زى ما قولنا هنجمع القشدة فى الفريزر حتى يكون عندنا كمية كويسة من القشطة لا تقل عن كيلو
صورى دى طالعة من حوالى 2 كيلو قشطة
1- هنطلع القشطة من الفريزر ونتركها حتى تفك من التجميد .
2- لو عند مضرب بيض كهربى متين استخدميه لو لا استخدمى ايدك بعد ما فكت القشطة هنضربها بالمضرب الكهربى وانا قولت متين لان وانتى بتضربيها هتشوفيها تتقل اوى فلو المضرب ضعيف ممكن يتكسر او اعملى بايديك كأنك بتقلبيها بأيديك هتحسيها تتقل وبعد شوية هينزل منها لبن زى اللى فى الصورة دى:
3- هنسيب اللبن وناخد القشطة المتبقية وعندى حالتين اما انك تعمليها كور وتظغطى عليها بأيدك عشان تطلعى اللبن منها قدر المستطاع وتضعيها فى كيس بلاستيك نظيف وعلى الفريزر وبكدة دى تعتبر زبدة بلدى يعنى لو بتعملى كيك بالزبدة ممكن تستخدميها بدل الزبدة الصفرا.
4- لو عايزين نعملها سمن هتجيبى حلة تيفال وتحطى كور الزبدة اللى عملتيها(ومحطتيهاش فى الفريزر لازم تكون فى درجة حرارة الغرفة) اللى وتحطيها على نار هادية وتحتها شياطة لان تسييح الزبدة بيحتاج نار ضعيفة خدى بالك واما تحترق وحطى مثلا على 2 كيلو قشطة معلقة ملح كبيرة مش مليانة عشان المورتة تطلع مالحة وخدى بالك ماتزوديش الملح.
5- هتبتدى تسيح طبعا بتاخد وقت حوالى اربع ساعات مع التقليب المستمر وماتغطيش الحلة .
6- هى بتمر بعدة مراحل خلال التسييح فأترككم مع الصور
7- امتى بقى نعرف ان كدة خلاص ونطفى؟
هقولك: لما يتكون فى قاع الحلة المورتة وما ادراكى ما المورتة خطييييييييييييييرة هتكون لونها بنى فاتح عشان كدة بقولك لازم التقليب المستم والا عتحترق المورتة وتلتصق فى قاع الحلة وبكدة نطفى النار.
8- تكونى محضرة برطمان زجاج نظيف وجاف وتروحى معقماه ازاى؟!
تولعى البوتاجاز نار هادية وتحطى فم البرطمان وهتدى البرطمان شبر تطفى النار وتتركيه لحد ما تروح الشبورة طبعا الكلام دة تكونى عملاه قبل ما تخلصى تسييح السمنة لان احنا عايزين نصب السمنة فى البرطمان وهية سخنة عشان تكون مرملـــــــــــــة.
9- بعد ما طفينا النار على السمنة هنجيب مصفاة واصب السمنة فى البرطمان وهيتبقى لى فى المصفاة المورتة ونترك معاها كدة معلقة صغيرة سمن.
10- نغطى برطمان السمن بكيس بلاستيك تحت الغطاء طبعا اول ما نصبها هتكون سايحة وبعد شوية هتشوفيها كدة.
11- نيجى بقى للمورتة عية بتكون محببة وانا بحبها ناعمة فهناخدها على الفود بروسيسور او الكبة او الخلاط اللى عندك يعنى وتحطى معلقة لبن واضربيها حتى تصبح ناعمة.
وبالهنا والشفا
ممكن اعرف ازاى السمنه تبقى خضراء يعنى نضيفلها ايه
ردحذفمفيش حاجه اسمها سمنه خضرا هى سمنه الشتاء بتكون فيها لون البرسيم فبتكون خضراء وفى الخوصو الجاموسى منها بيكون ظاهر جدا الخضار انما مش خضرا ولا بقدونس
حذفانا بصراحة معرفش ان فى سمنة خضرا والله
ردحذفاسفة جدا
بس فى ناس تحب تعمل زبدة بنكهة معينة يعنى تخلطها مثلا بثوم وبقدونس فى الفودبروسيسور وتعملها رول وتحفظ فى الفريزر دى ممكن لونها يكون اخضر معرفش تقصدى كدة ولا ايه
جزاجكم الله خيرا
ردحذفلكىمنىجزيل الشكر
ردحذفانا ضربتها جامد فى المضرب المتين مدة طويلة بس مش عايزة تفصل الزبدة عن القشطة كلها سايحة على بعضها وعاملة ككمية كبيرة احط اية فيها علشان تفصل الزبدة والبن يظهر فى الاخر واكورها خدى بالك انا بضربها بقالى كتير اوى
ردحذفاعملى القشطه على النار الهاديه هتطلع سمنه ومورته جميله جدا ....شوفى الطريقه على اليو تيوب
حذفشكرا وتسلم ايديك
ردحذفشكرا جزيلا انا عملتهاعلى نار هادئة وقعدت خمس ساعات وتعبت .هل ممكن احط معها زيت ذرة ام لا
ردحذف