الطعمية او الفلافل المقرمشة ......................
المقادير:
كوب فول مدشوش
كوب حمص شام (يمكن استبداله بكوب فول مدشوش)
2 بصلة متوسطة
2 فص توم كبير
خضرة
الطريقة :
1 - ننقع الفول والحمص لمدة لا تقل عن 12 ساعة مع تغيير الماء كل فترة
2 – نضع فى الفودبروسيسور الفول المنقوع والحمص بعد ما نغسلهم ونشطفهم من الماء
3 – نضع معهم البصل والثوم والخضرة والخضرة مش قادرة احدد الكمية لان انا بحط لحد ما احس اللون الطعمية اخضر وحلو ممكن حوالى 3 حزم
3 – نضرب المكونات معا حتى يصبح الخليط ناعم قدر المستطاع كل ما كان انعم كان افضل
4 – طبعا دى كمية كبيرة فانا بحطها فى اكياس وعلى الفريزر يعنى خلى الكيس على اد الاكلة حسب عدد افراد البيت وعند استخدامها بتطلعيها من الفريزر وتحطيها فى الثلاجة من اليوم اللى قبله
5 – نضع عليها قليل من الكمون كتير من الكسبرة وملح
6 – نسخن الزيت الغزير فى الطاسة بحيث تكون النار متوسطة لان لو عالية هيحترق وجه الطعمية وتسود
7 – نشكل الطعمية بحيث لا تضغطى على القرص وانتى بتقرصيها عشان ماتكونش مكبوسة يعنى كوريها كورة عشوائية و نقليها بين ايدك يمين شمال زى ما بتشوفى الرجل اللى بيعمل الطعمية فى المحلات وتحطى على وشها سمسم او كسبرة
8 – تلقى فى الزيت الساخن وعندما يحمر الوجه تققلب الجهة الاخرى ثم تنشل من الزيت وتوضع فى مصفاة للتخلص من اى زيوت زيادة
تقدم ساخنة فى الافطار
نصيحة : عند استخدام حمص الشام فإنكى تحصلى على طعمية مقرمشة لا تشرب الزيت
وبالهنا والشفا
ليست هناك تعليقات:
إرسال تعليق
بمشيئة الله سيتم الرد على استفتاراتكم من خلال التعليقات