تورتة الشيكولاتة والكريمة

تورتة الشيكولاتة والكريمة والمكسرات

تحضير كيكة اسفنجية وانا عملتها هنا قبل كدة فى اللينك دة:

الكيكة الاسفنجية بطريقة سهلة وسريعة

تحضير الكريمة البيضاء

وافضل شيئ ليها هوة كريم شانتيه وبدل ما يضرب باللبن يضرب بويبنج كريم

وانا عادة بفضل انى اقلل من كمية اللبن او الويبنج اللى المفروض تتضاف لها يعنى لما نشترى دريم ويب كريم شانتيه هنجد التعليمات عالعبوة اضافة 200 مل لبن انا بضيف 150 مل سواء ويبنج كريم او لبن

هنا انا مستبدلة اللبن بالويبنج كريم مثل ما ذكرت بالاول

لتغطية الكيك من الخارج

بنحتاج حوالى 4 عبوات كريم شانتيه دريم ويب و250 ويبنج كريم جهينة

للحشو نفس السابق مع اضافة حوالى نص كوب شيكولاتة مذابة مع معلقة كبيرة كاكاو بودر خام

لتحضير جلاسيه الشيكولاتة

330 جم شيكولاتة خام

250 مل ويبنج كريم

1 - تبشر الشيكولاتة بالسكين

2 - تسخن الويبنج كريم حتى الغليان

3 - تضاف الويبنج كريم الساخن على الشيكولاتة المبشورة وننتظر دقيقة ثم نقلب بمعلقة خشبية او بلاستيكية حتى تمام التجانس

وتترك فى المطبخ 10-15 دقيقة حتى تبرد

لتحضير المكسرات المكرملة

صراحة انا استخدمت سودانى لكن اذا متوفر بندق يكون اطيب طبعا

انا بعملها من غير مقادير بس ممكن نقول مقادير تقريبية:

21/4 كوب بندق او سودانى
كوب سكر

1 - هنضع فى طاسة سكر

2 - ونشغل النار متوسطة بدون تقليب حتى يصبح السكر بنى متكرمل فاتح على الاطراف حتى الداخل ممكن تحريك الطاسة والافضل عدم التقليب بالمعلقة واول ما يصبح اللون متكرمل بنى فاتح اضع المكسرات واقلب تقليبتين كدة واطفى

3 - ثم افردها على فويل واتركها تبرد تماما مع الحرص لان درجة حرارة السكر بتكون عالية جدا

4 - لما تبرد هتكون لوح جامد نكسرها ونضعها فى الفودبروسيسور ونطحنها نص طحنة كدة يعنى ماتكونش بودر

خطوات تحضير التورتة

1- طبعا مثل ما ذكرنا فى موضوع سابق هنقسم الكيك الاسفنجية 3 اقسام او نعمل 2 كيك ويكونوا 4 اقسام حسب الارتفاع اللى تحبيه للكيك

2 - مع كل طبقة ندهن بفرشاة وجه الكيك بشربات خفيف(كوب سكر+كوب ماء +عصرة ليمونة)

3 - نفرد الحشو حسب الرغبة فى كل الطبقات

4 - نغطى الكيك من الخارج بالكريمة البيضاء اللسابق وحضرناها

5 - هضع الكيك على شيئ عالى شوية زى طبق بلاستيك مقلوب والصق عليها المكسرات المكرملة انا لصقته على نصفها فقط لان النصف الثانى هيكون للشيكولاتة

6 - نضعها فى الثلاجة ساعتين او الفريزر حتى يجمد الكريمة البيضاء

7 - نرسم الوردات بكيس الحلوانى كما فى الصورة ونضعها فى الثلاجة تجمد

8 - ثم نصب على النصف التانى جلاسيه الشيكولاتة انا بحب استخدم اثناء الصب شيئ مثل هذا الكوب

وممكن تحضير اشكال بالشيكولاتة المذابة على بخار الماء

نضع الشيكولاتة المذابة فى كيس حلوانى والافضل عمل قرطاس بورق الزبدة ورسم اى شكل تفضليه مثل قلب او وردات على ورق زبدة ايضا او اى شيئ بلاستيكى مثل بلاستيك حافظة الاوراق مثلا وتترك حتى تجف وتوضع على الجزء الابيض فى التورتة