صينية الجلاش بقشطة الحلوانى والمكسرات او البقلاوة
اولا هنعمل قشطة الحلوانى وهي المهلبية
نضع على النار لحجم الصينية اللى انا عملاها حوالى 3/4 كوب لبن ونذوب حوالى 4 ملاعق نشا صغيرة فى الماء واول ما اللبن يغلى نحط النشا المذاب فى الماء بس شوية شوية ونقلب يعنى ممكن ما نحتاجه كله لان المهلبية المفروض تكون مش سميكة عشان نقدر نفردها على الجلاش واول ما تغلى اطفى النار وحطى عليها معلقة زبدة صغيرة وقلبيها المفروض قوامها يكون بالشكل دة
ثانيا هنفرم فى الكبة المكسرات طبعا الجلاش مشهور بالفسدق لكن انا هنا عملته بالسودانى
ثالثا طبعا احنا قبلها بكم ساعة مخرجين الجلاش من الفريزر واول ما نبدأ شغلنا نحطه فى فوطة مطبخ نظيفة طبعا ومندية بالماء عشان ماينشفش
رابعا ودة السر اللى بيخلى الجلاش يتنفخ ويورق ويكون طرى من جوة ومقرمش من برة وهو ان بندهن كل ورقة جلاش بخليط زبدة على قشطة (القشطة هى:طبعا موجودة فى اللبن الطبيعى الجاموسى او البقرى بعد ما نغليه كويس نحطه فى الثلاجة تانى يوم نجد على وش اللبن القشطة ) من غير مقدار نضع مثلا معلقتين زبدة بدرجة حرارة الغرفة على 4 ملاعق قشطة ونخلطهم جيدا هيكون بالشكل دة
خامسا ندهن الصينية بسمن او زبدة بس من غير قشطة عشان ماتتحرقش وايضا اول ورقة جلاش
بعد كدة هندهن كل ورقة جلاش بخليط الزبدة والقشطة نعمل حوالى 8 طبقات ثم نضع الحشو :المهلبية والمكسرات المطحونة سواء الفسدق او السودانى ومنحطش على الاطراف اوى عشان واحنا بنقطعها الحشو مايطلعش برة
ثم نكمل 8 طبقات اخرى وندهن كل واحدة ايضا بخليط القشطة والزبدة ثم اخر طبقة ندهنها بزبدة فقط ثم نقطع بالسكين مربعات او الشكل اللى نحبه
نكون مسخنين الفرن قبلها بحوالى ربع ساعة على 200 رف اوسط
هنلاقيها مورقة وشكلها وطعمها تحفة نكون محضرين الشربات تقيل(2 كوب سكر +كوب ماء ونصف ليمونة عند الغليان) يكون بدرجة حرارة الغرفة انا عادة بحضره قبلها بيوم وبتركه فى المطبخ مادامت الحكاية كلها ليلة واحدة
اول ما تطلع من الفرن نصب الشربات
ودة بعد التقطيع
وبألف هنا وشفا
ليست هناك تعليقات:
إرسال تعليق
بمشيئة الله سيتم الرد على استفتاراتكم من خلال التعليقات